నిజాయితీ, కృతజ్ఞత, స్నేహానికి విలువ ఇచ్చే వ్యక్తులు ఈ రోజుల్లో అరుదుగా కనిపిస్తున్నారు. అలాంటి విలువలను నిలబెట్టిన ఓ వ్యక్తి కథ ప్రస్తుతం జగిత్యాల జిల్లా ధర్మపురిలో అందరి ప్రశంసలు అందుకుంటోంది. పాత అప్పును మరచిపోకుండా, దాన్ని తీర్చేందుకు వేల కిలోమీటర్ల దూరం ప్రయాణించి వచ్చిన కేరళకు చెందిన వ్యక్తి చర్య స్థానికులను భావోద్వేగానికి గురిచేసింది.
కేరళ రాష్ట్రంలోని పాలక్కాడ్ ప్రాంతానికి చెందిన మహ్మద్ ఇస్మాయిల్, సుమారు పాతికేళ్ల క్రితం ధర్మపురికి చెందిన ఎడ్ల లచ్చన్నతో కలిసి సౌదీ అరేబియాలో ఉద్యోగం చేశారు. ఆ సమయంలో వ్యక్తిగత అవసరాల కోసం ఇస్మాయిల్ తన స్నేహితుడు లచ్చన్న వద్ద కొంత మొత్తాన్ని అప్పుగా తీసుకున్నారు. భారత్కు తిరిగి వచ్చిన తర్వాత ఆ డబ్బును తప్పకుండా తిరిగి చెల్లిస్తానని హామీ ఇచ్చారు.
అయితే కాలక్రమేణా ఇద్దరి మధ్య సంబంధాలు తెగిపోయాయి. స్వదేశానికి వచ్చిన తర్వాత ఒకరినొకరు సంప్రదించుకునే అవకాశం లేకపోవడంతో అప్పు తీర్చాలన్న ఇస్మాయిల్ సంకల్పం నెరవేరలేదు. అయినప్పటికీ ఆయన మనసులో ఆ బాధ్యత మాత్రం ఎప్పుడూ నిలిచిపోయింది.
బీపీ కూడా సైలెంట్ కిల్లరే.. జీవనశైలి మారిస్తే నియంత్రణ సాధ్యమని నిపుణుల సూచన
ఇటీవల ఆ అప్పును ఎలాగైనా చెల్లించాలని నిర్ణయించుకున్న ఇస్మాయిల్, లచ్చన్న గురించి సమాచారం సేకరించే ప్రయత్నం ప్రారంభించారు. పూర్తి చిరునామా, ఫోన్ నంబర్ వంటి వివరాలు లేకపోయినా, లచ్చన్న స్వస్థలం ధర్మపురి అనే విషయం మాత్రమే గుర్తుండటంతో గూగుల్ సహాయంతో జగిత్యాల జిల్లాకు చేరుకున్నారు.
అక్కడికి వచ్చిన తర్వాత స్థానికులను అడుగుతూ లచ్చన్న ఇంటిని వెతికారు. చివరకు గురువారం ఆయన నివాసాన్ని గుర్తించి కుటుంబ సభ్యులను కలిశారు. అప్పటికే లచ్చన్న ఉపాధి నిమిత్తం గల్ఫ్ దేశంలో ఉండటంతో కుటుంబ సభ్యులకు తన వివరాలు తెలియజేశారు. అనంతరం లచ్చన్నతో ఫోన్లో మాట్లాడగా, ఎన్నో ఏళ్ల తర్వాత పాత మిత్రుడి స్వరం విని ఆయన ఆనందానికి అవధులు లేకుండా పోయాయి.
ఈ సందర్భంగా మహ్మద్ ఇస్మాయిల్ రూ.25 వేల నగదును లచ్చన్న కుటుంబ సభ్యులకు అందజేశారు. ఇన్నేళ్లుగా తన మనసులో మిగిలిపోయిన రుణ బాధ్యతను నెరవేర్చినందుకు సంతృప్తి వ్యక్తం చేశారు. మరోవైపు, స్నేహితుడు ఇచ్చిన మాటను నిలబెట్టుకుని ఇంతకాలం తర్వాత కూడా అప్పు తీర్చేందుకు ప్రత్యేకంగా రావడం చూసి లచ్చన్న కుటుంబ సభ్యులు ఆనందం వ్యక్తం చేశారు.
ప్రియుడి మోజులో కన్న కొడుకును హతమార్చిన తల్లి.. సిద్దిపేటలో సంచలనం
ప్రస్తుతం చిన్న మొత్తాల అప్పులు కూడా తిరిగి చెల్లించకుండా తప్పించుకునే సంఘటనలు తరచూ వినిపిస్తున్న తరుణంలో, 25 సంవత్సరాల తర్వాత కూడా తన బాధ్యతను గుర్తుంచుకుని అప్పు తీర్చిన మహ్మద్ ఇస్మాయిల్ వ్యవహారం అందరికీ ఆదర్శంగా నిలుస్తోంది. నిజాయితీ, కృతజ్ఞత, స్నేహబంధం ఇంకా సమాజంలో సజీవంగానే ఉన్నాయని ఈ ఘటన మరోసారి నిరూపించింది.
ధర్మపురిలో చోటుచేసుకున్న ఈ అరుదైన సంఘటన ప్రస్తుతం స్థానికంగా చర్చనీయాంశంగా మారడంతో పాటు సోషల్ మీడియాలో కూడా ప్రశంసలు అందుకుంటోంది.
