ఎన్టీఆర్ జిల్లా నందిగామలో గణపతి నవరాత్రి ఉత్సవాలు ప్రత్యేక ఆకర్షణగా నిలుస్తున్నాయి. నందిగామలోని వాసవి మార్కెట్ వ్యాపారులు ప్రతి ఏడాది వినూత్న రీతిలో గణపతి ఉత్సవాలను నిర్వహిస్తుండగా.. ఈసారి ఏకంగా రూ.4.50 కోట్ల విలువైన కరెన్సీ నోట్లతో లక్ష్మీ గణపతిని అలంకరించారు.
వాసవి మార్కెట్ గణపతి ఉత్సవాలకు ఈ ఏడాదితో 44వ సంవత్సరం పూర్తయింది. సుమారు 11 సంవత్సరాల క్రితం రూ.10 లక్షల విలువైన కరెన్సీ నోట్లతో గణపతిని అలంకరించే సంప్రదాయాన్ని ప్రారంభించినట్లు నిర్వాహకులు తెలిపారు. అప్పటి నుంచి ప్రతి సంవత్సరం అలంకరణ విలువను పెంచుతూ వస్తున్నామని చెప్పారు.
ALSO READ: చౌక ధరకు భోజనం పెట్టిన హోటల్ యజమాని విషాదాంతం.. ప్రజల ఆకలి తీర్చిన వ్యక్తి.
గతేడాది సుమారు రూ.3.33 కోట్ల విలువైన కరెన్సీతో గణపతిని అలంకరించగా.. ఈ ఏడాది ఆ మొత్తం రూ.4.50 కోట్లకు చేరింది. రూ.100, రూ.500 తదితర నోట్లను ఉపయోగించి మండపం, స్వామివారి అలంకరణను ప్రత్యేకంగా రూపొందించారు.
ఈ అలంకరణలో నందిగామకు చెందిన వ్యాపారులతో పాటు ఇతర ప్రాంతాల నుంచి వచ్చిన భక్తులు కూడా భాగస్వాములవుతున్నట్లు నిర్వాహకులు తెలిపారు. అలంకరణ పూర్తయిన తర్వాత కరెన్సీ నోట్లను సంబంధిత వ్యక్తులు తిరిగి తీసుకెళ్తారని వెల్లడించారు.
వారం రోజుల శ్రమతో ప్రత్యేక అలంకరణ
లక్ష్మీ గణపతి అలంకరణ కోసం కిరీటం, దండలు, వడ్రాణాలు, లడ్డూలు తదితర ప్రత్యేక అలంకరణ వస్తువులను ముందుగానే సిద్ధం చేశారు. ఇందుకోసం సుమారు వారం రోజులపాటు పనులు కొనసాగినట్లు నిర్వాహకులు తెలిపారు. కరెన్సీ నోట్లతో చేసే ప్రధాన అలంకరణను ఒకరోజు మాత్రమే భక్తుల దర్శనార్థం ఉంచినట్లు చెప్పారు.
ALSO READ: అధిక నెలసరి రక్తస్రావం తగ్గించుకోవచ్చా? 25% Sperm Count ని రెండు వారాల్లో పెంచే పొడి ఇది.
13 రోజుల పాటు వైభవంగా ఉత్సవాలు
వాసవి మార్కెట్ ఆధ్వర్యంలో మొత్తం 13 రోజులపాటు గణపతి ఉత్సవాలను నిర్వహిస్తున్నారు. ప్రతిరోజూ విభిన్న అలంకరణలతో గణపతిని భక్తులకు దర్శనమిచ్చేలా ఏర్పాట్లు చేస్తున్నారు.
ఉత్సవాల్లో భాగంగా వివిధ ప్రముఖ దేవాలయాల నుంచి ఉత్సవమూర్తులను తీసుకొచ్చి కళ్యాణోత్సవాలు నిర్వహించడం కూడా ఇక్కడ ఆనవాయితీగా కొనసాగుతోందని నిర్వాహకులు తెలిపారు. ఈ ఏడాది కోనసీమ వాడపల్లి వెంకటేశ్వర స్వామి వారి కళ్యాణోత్సవాన్ని ప్రత్యేకంగా నిర్వహించినట్లు చెప్పారు.
ALSO READ: పెళ్లైన 15 రోజులకే విషాదం: అమెరికాలో హైదరాబాద్ యువకుడు మృతి
అలాగే భక్తుల కోసం అన్నదాన కార్యక్రమాలను కూడా ఏర్పాటు చేస్తున్నారు. వ్యాపారులు, మహిళలు, భక్తులు ఉత్సవాల ఏర్పాట్లలో ఉత్సాహంగా పాల్గొంటున్నారు.
కరెన్సీ నోట్లతో చేసిన లక్ష్మీ గణపతి అలంకరణను చూసేందుకు పెద్ద సంఖ్యలో భక్తులు తరలివస్తుండటంతో నందిగామలో ఈ ఉత్సవాలు ప్రత్యేక ఆకర్షణగా మారాయి. రాబోయే రోజుల్లోనూ మరింత వైభవంగా, భక్తులకు అందుబాటులో ఉండేలా ఉత్సవాలను నిర్వహించేందుకు ప్రయత్నిస్తామని నిర్వాహకులు తెలిపారు.